Nembo/Logo za Kibiashara Zilizobeba Maana Usizozijua - Fahamu Hili
Friday, March 29Maarifa Bila Kikomo
Shadow

Nembo/Logo za Kibiashara Zilizobeba Maana Usizozijua

Washirikishe Wengine Makala Hii:

Logo au Nembo ya Toyota

Kama unavyojua nembo au logo ya kibiashara ina nafasi kubwa katika utambulisho wa kampuni. Nembo iliyobuniwa vizuri inaweza kuwafanya watu wengi kutambua huduma au bidhaa unayotoa. Hii ndiyo sababu logo nyingi hupitia usanifu na maboresho mbalimbali ili kuhakikisha zinawakilisha kampuni au biashara vyema.

Hata hivyo, zipo logo zilizofanikiwa kufanya vizuri  wakati nyingine hazijafanikiwa. Kwa zile zilizofanikiwa unaweza kushangaa ni kwa namna gani wabunifu wake wameweza kuficha maana fulani muhimu kuhusu kampuni husika.

Fahamuhili kwa kutambua umuhimu wa utambulisho katika biashara au kampuni, tumekuletea orodha hii ya nembo zaidi ya 10 pamoja na maana zilizojificha ndani yake. Tunaamini makala hii itakupa mwangaza muhimu pale utakapokuwa unatengeneza logo yako.

Soma pia: Mambo ya Kuzingatia Kabla ya Kuchagua Jina la Biashara.

1. Toyota

Toyota ni kampuni mashuhuri ya kutengeneza magari. Nembo ya Toyota inavutia, kwani imejumuisha herufi zote za jina lake katika nembo husika. Je ulilifahamu hili? Unaweza kutazama hili katika picha hapa chini.Nembo ya Toyota

2. FedEx

FedEx ni kampuni ya usafirishaji ambayo ina nembo rahisi ukiitazama kwa haraka. Ukitazama kwa karibu nembo ya FedEx kati ya herufi “E” na “X” utaona mshale, ambao kwa hakika unamaanisha “haraka na kwa uhakika”.Nembo ya Fedex

3. Pinterest

Pinterest inalenga watumiaji wake kuweza kushikiza au kupini vitu mbalimbali kutoka kwenye mtandao kwenda kwenye ukurasa wa Pinterest. Ni dhahiri kuwa ndiyo sababu kitu kama kipini kimewekwa kwenye “P” pamoja na jina lenyewe kuwa “Pin..” yaani shikiza.pinterest

4. Amazon

Amazon ni duka au soko maarufu la kwenye mtandao. Logo yao ina mshale kwa chini unaoonyesha toka herufi “A” hadi “Z” wakimaanisha kuwa wana kila kitu unachokihitaji. Imekuwa ikitafsiriwa vibaya kuwa inamaanisha tabasamu “smile” lakini siyo kweli.Nembo ya Amazon

5. Sony VAIO

VAIO ni chapa ya Sony kwenye kompyuta pakato “laptop” wanazozizalisha. Alama ya VAIO siyo pambo bali inamaanisha kubadili mawimbi ya analogia kuwa ya digitali. Mawimbi ya analogia yamewakilishwa na “V” na “A”. wakati “I” na “O” vikimaanisha “1” na “0” ambazo ni tarakimu za kidigitali.Nembo ya Sony Vaio

6. Cisco

Cisco inajulikana kwa kubuni, kuzalisha na kuuza vifaa vya mawasiliano. Hivyo si jambo la kushangaza kwa wao kuweka alama ya mawimbi ya kidigitali kwenye nembo yao. Alama hiyo ya mawimbi kwenye nembo yao pia inakaribia kufanana na daraja la “Golden Gate” lililoko San Francisco. Kwa njia hii Cisco wameweza kuonyesha wanachokifanya pia mahali walipo (San Francisco).Nembo ya Cisco

7. Picasa

Tovuti hii ya Google ya kuhariri na kusambaza picha haimaanishi tu jicho la kamera. Neno Picasa linasimama kuwakilisha “nyumba ya picha”. Casa ni neno la Kihispania linalomaanisha nyumba; ambapo ni dhahiri unaweza kuona umbo kama nyumba katikati ya nembo.Nembo ya Picasa

8. Formula 1

Formula 1 ni mashindano ya magari yanayofahamika pia kama F1. Katika nembo yao kuna F nyeusi pamoja na umbo jekundu likimaanisha kasi au mbio – lakini je, moja inatoka wapi? Tazama kwa karibu kati ya F na umbo jekundu utaona 1.Nembo ya Formular1

9. Cologne zoo

Hii ni nembo ya bustani ya wanyama ya Cologne; nembo hii haionyeshi tu kifaru na twiga kwenye umbo la tembo bali inaonyesha pia vinara vya kanisa kuu la Cologne Ujerumani.Nembo_ya_Cologne

10. Continental

Hii ni kampuni ya kuzalisha na kuuza magurudumu. Ukichunguza kwa karibu kati ya herufi “C” na “O” utaona umbo la gurudumu au tairi.Nembo ya Continental

11. LG

LG ni kampuni maarufu ya kutengeneza na kuuza vifaa mbalimbali vya kielektroniki. LG wametumia “L” na “G” kwenye nembo yao ili kuunda umbo la uso. Pia wametumia rangi yekundu wakimaanisha urafiki. Hii inalenga falsafa yao ya ubinadamu na kujenga mahusiano mazuri na wateja wake ulimwenguni.Nembo ya LG

12. Gillette

Gillette ni kampuni maarufu ya kutengeneza vifaa mbalimbali hasa nyembe na vifaa vya kunyolea. Ukitazama kwa karibu utaona “G” na “I” vimekatwa kwa makali; hii ni kudhihirisha ukali (makali) ya nyembe na vifaa vyao vya kunyolea.Nembo ya Gillette

13. Unilever

Unilever ni nembo ambayo maana nyingi zimefichwa ndani yake. Ukichunguza kwa karibu nembo hii utaona bidhaa au shunguli mbalimbali za Unilever zikiwa pamoja na kuunda umbo la “U”. Ni dhahiri kuwa kwa haraka unaweza kuona matunda na vitu vingine vinavyohusiana na vyakula.Nembo ya Unilever

14. BMW

BMW ina historia ya kuanzia kwenye maswala ya ndege, na ni dhahiri kuwa nembo yao imetunza hili. Sehemu nyeupe inawakilisha pangaboi linalozunguka wakati sehemu ya bluu inawakilisha anga.Nembo ya BMW

15. Wikipedia

Wikipedia ni kamusi au elezo huru maarufu sana duniani kwa sasa. Ni wazi kuwa ukitazama nembo ya Wikipedia utaona tufe lililotengenezwa kwa mchezo-fumbo (jigsaw) ambalo halijakamilika. Ni wazi kuwa nembo hii imebeba sera ya Wikipedia ya maarifa kwa kila mtu na kila mahali. Pia kukosekana kwa vipande katika tufe inamaanisha kuwa itakuwa ikiongezwa na kuboreshwa kila wakati.Nembo ya Wikipedia

Hitimisho

Hizi ni baadhi tu ya nembo ambao zimefanikiwa kuwasilisha ujumbe fulani au maana fulani inayohusiana na kampuni au biashara husika. Ni wazi kuwa umeona maana mbalimbali zilizofichwa katika nembo hizi. Ni matumaini yangu kuwa pia umeona na kufahamu jinsi ilivyo muhimu kutengeneza na kutumia nembo ambayo inaweza kutambulisha biashara yako kikamilifu.

Je una swali, maoni au mapendekezo? Tafadhali tuandikie hapo chini kisha washirikishe wengine.

4.5 4 votes
Pendekeza Ubora wa Makala Hii
Washirikishe Wengine Makala Hii:
Subscribe
Notify of
guest

4 Maoni
Oldest
Newest Most Voted
Inline Feedbacks
View all comments
james
james
3 years ago

nashukuru mkuu nimekuelewa
 

James Joseph
James Joseph
3 years ago

Naomba tuwasilianee 0744503476 Kuna kitu nahitaji kuongea na wewe

4
0
Would love your thoughts, please comment.x
()
x